جەماوەر نیوز
هونه‌رمه‌ندى فیلمساز "کامیل قادر" ئه‌ندامى لقى که‌رکووکى سه‌ندیکاى هونه‌رمه‌ندانى کوردستان کۆچى دوایى کرد.
له‌و باره‌یه‌وه‌، لقى که‌رکووکى سه‌ندیکاى هونه‌رمه‌ندانى کوردستان ڕایگه‌یاند، "دواى ململانێ له‌گه‌ڵ نه‌خۆشى و چه‌ند ڕۆژێک مانه‌وه‌ى له‌ژێر چاودێرى پزیشک، ڕۆژى شه‌ممه‌ (3ـى شوباتى 2024)، هونه‌رمه‌ندى فیلمساز "کامیل قادر" ئه‌ندامى لقى که‌رکوکى سه‌ندیکاى هونه‌رمه‌ندان کۆچى دوایى کرد".
ته‌رمى هونه‌رمه‌ندى کۆچکردوو، به‌ ئاماده‌بوونى که‌سوکار و هاوڕێ و دۆستانى له‌ هونه‌رمه‌ندان و ڕۆشنبیریانى که‌رکووک، له‌ گۆڕستانى "ڕه‌حیمئاوا" به‌خاکسپێردرا.

وێستگه‌کانى ژیانى هونه‌رمه‌ند
- هونه‌رمه‌ند کامیل قادر حه‌مید، ساڵى 1964 له‌ که‌رکووک له‌دایکبووه‌.
- له‌ ساڵى 1980 وه‌ک ئه‌کته‌ر ڕۆڵى له‌ شانۆى "فایلى ژماره‌ 26" گێڕاوه‌.
- ساڵى 1982 وه‌ک سه‌رپه‌رشتیارى زانستى بۆ به‌شى وێنه‌گرتن کارى کردووه‌ و ڕاهێنان و خولى له‌ باره‌ى به‌کارهێنانى کامێرا بۆ گه‌نجانى که‌رکووک کردووه‌ته‌وه‌.
- ساڵى 1987 به‌شى ژمێریارى په‌یمانگه‌ى کارگێڕى له‌ ناسریه‌ ته‌واو کردووه‌.
- له‌ بوارى نووسینى ده‌قى شانۆیى و سینه‌ماییدا چه‌ندین به‌رهه‌مى له‌ دواى خۆى به‌جێهێشتووه‌. 
- ئه‌ندامى یه‌کێتى هونه‌رمه‌ندانى عێراق و هه‌رێمى کوردستان بووه‌.
- ئه‌ندامى دامه‌زرینه‌رى هونه‌ره‌ ڕۆشنبیرییه‌کانى عێراق بووه‌.
- ئه‌ندامى ڕێکخراوى سینه‌ماى گه‌لان بووه‌.
- ئه‌ندامى ماڵى سینه‌ما بووه‌ له‌ که‌رکووک.
- ماوه‌ى چه‌ند ساڵێک له‌ ته‌له‌ڤزیۆنى که‌رکووک وه‌ک ئه‌کته‌ر و وێنه‌گرى فۆتۆگرافى کارى کردووه‌.