جەماوەر نیوز

چاوەڕوان دەکرێت لە ماوەی 48 بۆ 72 کاتژمێری داهاتوو مووچەی مانگی یەک لەلایەن بەغداوە بنێردرێت. وەزارەتی دارایی کوردستان دەڵێت لە ماوەی سێ ڕۆژ دابەش دەکرێت، 'هەژماری من'ـیش هۆشداری بە بەشێک لە مووچەخۆران دەدات.

 ڕۆژی پێنجشەممە، وەزارەتی دارایی کوردستان وەک یەکێک لە پابەندییەکانی خەرجکردنی مووچە، بڕی 120 ملیار دیناری بە کاش خستە سەر هەژماری وەزارەتی دارایی عێراق لەڕێگەی لقی هەولێری بانکی ناوەندی.

لێدوانی فەرمییەکان: سەرچاوەیەک لە وەزارەتی دارایی کوردستان بە ئاڤای وت: چاوەڕوان دەکەین لە ماوەی دوو ڕۆژی داهاتوودا پارە بگات، سبەی یەکشەممە نووسراوەکان و ڕێکارەکان تەواو بکرێن و دووسبەی پارە بگات.

ڕۆژی سێشەممە پارە دەنێردرێت، تەیف سامی، وەزیری دارایی عێراق هەفتەی ڕابردوو لە دوبەی بوو، دواتر چووەتە ئەمریکا، ئێستا لەڕێگایە دەگەڕێتەوە عێراق و سبەی یەکشەممە دەوام دەکات، ئیتر دەست بە ڕێکارەکانی ناردنی پارە دەکرێت و سێشەممە دەنێردرێت.

 لەبارەی دابەشکردنی مووچە، ئەم مانگەش دابەشکردنی مووچە بە دوو شێواز دەبێت، بە کاش و بە دیجیتاڵی.

وەزارەتی دارایی کوردستان دەڵێت لەگەڵ گەیشتنی پارە، خشتەی دابەشکردنی مووچە بە کاش بڵاو دەکەنەوە، ڕۆژی دواتر دەست بە دابەشکردنی دەکەین و لە ماوەی سێ ڕۆژ تەواوی مووچە دابەش دەکەین.

لەلایەکی دیکەوە: تیمی هەژماری  ئێمەش تەنیا سێ ڕۆژمان پێویستە بۆ دابەشکردنی مووچە، ئەم مانگە نزیکەی 700 هەزار مووچەخۆر بە دیجیتاڵی مووچە وەردەگرن.

هۆشدارییش بەو مووچەخۆران دەدەن تا ئێستا خۆیان لە پڕۆژەکە تۆمار نەکردووە، دەڵێن: هەر مووچەخۆرێک خۆی تۆمار نەکردبێت مووچەکەی رادەگیرێت تا خۆی تۆمار دەکات، ئەم مانگەش واتا مانگی دوو، دوایین مۆڵەتە بۆ مووچەخۆران، هەر مووچەخۆرێک، فەرمانبەری هەمیشەیی بێت یان خانەنشین، فۆرم پڕنەکاتەوە و خۆی تۆمار نەکات، بەیەکجاری مووچەی ڕادەگیرێت و ناوی لە لیستی مووچە دەردەهێنرێت.