جەماوەر نیوز
کچێکی کوردی رۆژهەڵاتی کوردستان دوای ئەوەی بە نایاسایی چووەتە هۆڵەندا ماوەی سێ رۆژ بوو دیار نەبوو، چالاکڤانێکی بواری کۆچبەران دەڵێت: ئەو کچە لەگەڵ 16 کۆچبەری دیکە لەلایەن پۆلیسی هۆڵەنداوە دەستگیرکراون.

رەنج پشدەری، چالاکڤانی بواری کۆچبەری لە ئەورووپا بە رووداوی گوت: "ئەو ژنە کوردەی لە هۆڵەندا دیار نەمابوو، لەماوەی کەمتر لە رۆژێک لەدوای بڵاوبوونەوەی هەواڵی ونبوونی دۆزرایەوە و دەرکەوت لەلایەن پۆلیسە دەستگیرکراوە.

بەگوتەی رەنج پشدەری، دوێنێ لە میدیاکانی هۆڵەندا لەگەڵ 16 پەنابەری دیکە لەنێو بەفرگرێکدا گیرابوو کاتێک ویستوویانە لە هۆڵەنداوە بەڕی بکەون بەرەو بەریتانیا، بەڵام پۆلیس چاودێری کردوون و دواتر دەستگیری کردوون.

ئەو چالاکڤانانەی بواری کۆچبەران ئاشکرای کرد، لەو 16 کەسە نزیکەی 10 کەسیان کوردبوون، کە چوار کەسی خەڵكی سلێمانی، یەکێکیان خەڵکی هەولێر و پێنجەکەی دیکەش کوردی رۆژهەڵاتی کوردستان بوون.

رەنج پشدەری لەبارەی چارەنووسی ئەو ژنە گوتی: "ژنەکە مافی مانەوەی وڵاتی ئیتاڵیای هەیە و ئێستا ئەو ژنە لە هۆڵەندایە لەلایەن پۆلیسی ئەو وڵاتەوە لەگەڵ 16 کۆچبەر و دوو شۆفێری بارهەڵگرەکە گیراون."

بە گوتەی رەنج پشدەری، قاچاخچییەکان بۆ هەر یەکێک لەو کۆچبەرانە بڕی 10 هەزار و 500 پاوەندی بەریتانییان وەرگرتووە.