جەماوەر نیوز

تیمی کوردستانی عێراقی ڕێكخراوی CPTـی ئەمریكی بڵاویكردەوە، سەرباری پرۆسەی ئاشتی و ڕاگرتنی شەڕ لە نێوان توركیا و پەكەكە، بەڵام سوپای توركیا بەردەوامە لە دروستکردنی بارەگای سەربازی نوێ، بەهێزترکردنی بارەگا سەربازییە کۆنەکان، بنیاتنانی ڕێگەی سەربازی، تەقاندنەوەی چیاکان و بڕینەوەی دارستانەکانی هەرێمی كوردستان. ئەوەش نیگەرانییەكان لەبارەی ئایندەی پرۆسە ئاشتی لە توركیا زیاتر دەكات.
؛ 
تیمی کوردستانی عێراقی ڕێكخراوی CPT ئەمڕۆ سێشەممە لە ڕاپۆرتێكدا بڵاویكردەوە، لە ڕۆژی 6ی ئەم مانگەدا، بەمەبەستی دروستکردنی ڕێگا و دەروازەی سەربازی، سوپای تورکیا بەشێک لە گرد و چیاکانی نزیک لە (گەلی ڕەشاڤا)ی لە سنوری ناحیەی دێرەلوک، لە قەزای ئامێدی تەقاندەوە و بەشێکی زۆری دارستانەکانی دەوروبەری گەلیەکەشی بڕیەوە.
ئاماژەی بەوەشكرد، سوپای تورکیا پڕۆژەی ڕێگاوبانی سەربازی بۆ بەیەکەوە بەستنەوەی بنکە و بارەگاکان و دروستکردنی (ناوچەی دابڕی ئەمنی) لە (زاپ، ئاڤاشین، مەتینا و بەرواری باڵا) تەواوکردوە و دەروازەی ناوچە دابڕەکەش گەلی ڕەشاڤایە. لەگەڵ ئەوەشدا سێ کۆمەڵگەی سەربازی نوێی گەورەی لە سنوری قەزای ئامێدی دروستکردوە و ئەو کۆمەڵگە سەربازییانە لە (نەخۆشخانە، بنکەی مەشق و ڕاهێنان و تۆپخانە) پێکهاتون.
بەگوێرەی ڕاپۆتەكە، لە ڕۆژی 7ـی ئەم مانگەدا، دو هەلیکۆپتەری سەربازی تورکیا، بەسەر چیای مەتینادا سوڕانەوە و وەکو بەشێک لە مەشقی سەربازی، بە هەماهەنگی لەگەڵ کۆمەڵگە سەربازییە تازە دروستکراوەکاندا پریشکەی تەقەمەنییان بەسەر چیاکەدا خستەخوارەوە. هەروەها لە ڕۆژی 13ـی مانگدا، تۆپخانەکانی تورکیا سێ جار تۆپبارانی کوێستانەکانی (خنێرە)یان لە سنوری قەزای سیدەکان لە پارێزگای هەولێر کرد.
ڕێكخراوی CPT ئاماژە بەوەشدەكات، تەقاندنەوەی گرد و شاخەکانی گەلی ڕەشاڤا، بونەتە هۆی داڕمانی دو شوێنەواری مێژویی دیاری ناوچەکە، کە یەکێکیان پردی (دوشاو)ە و مێژوی دروستکردنی دەگەڕێتەوە بۆ سەردەمی حکومڕانی دەوڵەتی عەباسی. لەگەڵ ئەوەشدا هەزار و 192 گوند کە کاریگەری بۆردومان و ئۆپەراسیۆنە سەربازییەکانی سوپای تورکیایان لەسەر بوە، تەنیا گوندنشینانی پێنج گوند دەرئەنجامی ئەرێنی پڕۆسەی ئاشتیان بەدیکردوە و توانیویانە بگەڕێنەوە بۆ گوندەکانی خۆیان.

بەگوێرەی ڕاپۆتەكەی CPT، لە ساڵی 2025ـدا، سوپای تورکیا هەزار و 718 هێرش و بۆردومانی بۆ سەر هەرێمی کوردستان ئەنجامداوە، کە لەم ژمارەیە هەزار و 426 هێرشیان لەدوای ڕاگەیاندنی پڕۆسەی ئاشتی بون و نۆ هاوڵاتی مەدەنیش بونەتە قوربانی ئەو
تیمی کوردستانی عێراقی ڕێکخراوی CPT، نیگەرانی خۆی لە فراوانکردنی ئۆپەراسیۆنە سەربازییەکانی سوپای تورکیا، دروستکردنی بارەگای سەربازی نوێ، بەهێزترکردنی بارەگا سەربازییە کۆنەکان، بنیاتنانی ڕێگەی سەربازی، تەقاندنەوەی چیاکان و بڕینەوەی دارستانەکان دەردەبڕێت. لەهەمانکاتدا، داوای هەنگاوی ڕژدتر لە تورکیا و پارتی کرێکارانی کوردستان دەکات بۆ بەرەوپێشبردنی پڕۆسەی ئاشتی و کشانەوە لە ناوچە مەدەنی نشینەکان.

لە كۆتاییەكانی ساڵی 2024ـەوە بە دەسپێشخەری دەوڵەت باخچەلی، سەرۆكی مەهەپە لەناو پەرلەمانی توركیاوە، پڕۆسەیەكی نوێی ئاشتی لەو وڵاتە دەستپێكرد و دوای زنجیرەیەك كۆبونەوە، عەبدوڵا ئۆجەلانی ڕێبەری پەكەكە، لە 27ـی (شوبات/2)ـی 2025 داوای هەڵوەشاندنەوەی ئەو حزبە و دیموكراتی بۆ توركیای كرد. 
لە وەڵامدا پەكەكە مانگی (ئایار/5)ـی 2025ـدا كۆنگرەی 12ـی ئەنجامدا و بڕیاری خۆهەڵوەشاندنەوەی دا، هەروەها لە ڕۆژی 11ـی (تەمموز/7)، وەک نیازپاکی لەلایەن گروپێکی گەریلاوە کە ژمارەیان 30 کەسبو، چەکەکانیان داناو و دواتریش لە ڕێگەی ئاگرەوە سوتێنران. لەگەڵ ئەوەشدا ڕۆژی 26ی (تشرینی یەکەم/10)ـی ساڵی ڕابردو پەكەكە كشانەوەی تەواوەتی لە توركیا ڕاگەیاند.
لەنوێترین هەنگاویشدا کۆمیسیۆنی دیموکراسی، خوشک-برایەتی و یەکێتیی نەتەوەیی له‌ كۆتا كۆبونەوەیەدا لە هەفتەی ڕابردو كۆتا ڕاپۆرتی خۆی پەسەندكرد، ئەوەش ناڕەزایەتی كوردی لێكەوتەوە لەبەر ئەوەی ڕاپۆرتەکە پرسی کوردی خستوەتە چوارچێوەی 'تیرۆر'ەوە و چارەسەری درێژخایەن پێویستی بە هەمواری یاسایی و جێبەجێکردنی مافی هیوایە و هیواكانی له‌ناوبرد.