جەماوەر نیوز
سەرۆکی هەرێمی کوردستان و سەرۆکوەزیرانی عێراق لە پەیوەندییەکی تەلەفۆنیدا تاوتوێی دۆخی ئەمنیی ناوچەکەیان کرد و جەختیان لەوە کردەوە کە نابێت عێراق ببێتە گۆڕەپانی ململانێکان یان خاکەکەی بۆ هێرشکردنە سەر وڵاتانی دراوسێ بەکاربهێنرێت، هاوکات داوای یەکخستنی هەڵوێستی هێزە نیشتمانییەکانیان کرد.
نووسینگەی ڕاگەیاندنی محەممەد شیاع سوودانی بڵاوی کردەوە کە ئێوارەی ئەمڕۆ هەینی 6ی ئاداری 2026، لە پەیوەندییەکی تەلەفۆنیدا لەگەڵ نێچیرڤان بارزانی، سەرۆکی هەرێمی کوردستان، دواین پێشهاتە ئەمنی و سەربازییەکانی ناوچەکە و کاریگەریی ئەو ئۆپەراسیۆنانە لەسەر دۆخی عێراق گفتوگۆیان لەبارەوە کراوە.
لەو پەیوەندییەدا هەر دوو لا بە توندی دژی هەر جۆرە هێرش و دەستدرێژییەک وەستانەوە کە دەکرێتە سەر شارە جیاوازەکانی عێراق و هەرێمی کوردستان، هاوکات جەختیان لەوە کردەوە کە بە هیچ شێوەیەک ڕێگە نادرێت خاکی عێراق وەک پێگەیەک بۆ هێرشکردنە سەر وڵاتانی دراوسێ بەکاربهێنرێت و دەبێت هەموو هەنگاوەکان بە ئاراستەی بەهێزکردنی سەقامگیری بن.
سوودانی و نێچیرڤان بارزانی ئاماژەیان بەوە دا کە قۆناغی ئێستا و ئاڵنگارییەکانی وا دەخوازێت سەرجەم هێزە نیشتمانییەکان گوتار و هەڵوێستیان یەکبخەن، ئەوەش بە ئامانجی پاراستنی سەروەریی وڵات و بەهێزکردنی ئاسایشی نیشتمانیی عێراق.