جەماوەر نیوز
پیپ گواردیۆلای ئیسپانی، ڕاهێنەری مانچستەر سیتی، جەختی کردەوە کە تیپەکەی توانای ئەنجامدانی "ریمۆنتادا" و گۆڕینی ئەنجامەکەی هەیە بەرانبەر ڕیاڵ مەدرید لە یاری گەڕانەوەی قۆناغی 16ی خولی پاڵەوانەکانی ئەوروپا کە ئەمشەو سێشەممە بەڕێوەدەچێت.

مان سیتی یارییەکەی ئەمشەو دەست پێدەکات لەکاتێکدا بە ئەنجامی 0-3 دواکەوتوە لە یاری چوندا کە هەفتەی ڕابردو لە یاریگای "سانتیاگۆ برنابیۆ" لە مەدرید بەڕێوەچو. قەرەبوکردنەوەی جیاوازییەکی لەو شێوەیە تەحەدایەکی سەختە بۆ هەر تیپێک، چ جای بەرانبەر تیپێکی وەک ڕیاڵ مەدرید کە 15 جار نازناوی ئەم پاڵەوانێتییەی بەدەستهێناوە.

لەگەڵ ئەوەشدا، مان سیتی بەتایبەت لە سەردەمی پڕ لە دەستکەوتی گواردیۆلادا، ڕاهاتوە لەسەر ڕوبەڕوبونەوەی سەختترین تەحەداکان و دروستکردنی شەوی تایبەت لە یاریگای "ئیتیحاد" لە مانچستەر.

لە کۆنگرەی ڕۆژنامەوانی پێش یارییەکەدا، گواردیۆلا دوپاتی کردەوە کە تیپەکەی پێویستی بە پێشکەشکردنی یارییەکی نمونەیی (میسالی) هەیە بۆ گۆڕینی ئەنجامەکە بەرانبەر ڕیاڵ مەدرید و بەدەستهێنانی بلیتی سەرکەوتن بۆ قۆناغی هەشت.

ڕاهێنەرە ئیسپانییەکە ڕونی کردەوە کە ئەمە بۆنەیەکە دەبێت چێژی لێ وەربگیرێت و قەدری بزانرێت، جەختیشی کردەوە کە هیچ گومانێکی لە ئامادەیی یاریزانەکانی نییە بۆ ئەم ئەرکە و وتی: "ئەمە یاری تۆپی پێیە و زۆر شت دەکرێت ڕو بدات، ئەم وەرزشە فێری کردوین کە زۆر شت لە یەک یاریدا دەگۆڕێت، دەبێت سەرنج بدەین و سەرەتا هەوڵ بدەین یارییەکە ببەینەوە، پاشان دەبینین چی ڕودەدات".

ئەو ڕاهێنەرەی کە بە "فەیلەسوف" ناسراوە، وتیشی: "زۆربەی یاریزانەکان لەم ئەزمونەدا نوێن و ئێمە هەمان ئەو گروپەی ساڵانی پێشو نین، بەڵام لە هەمان کاتدا ئەمە ئەزمون و هەلێکی ناوازەیە بۆ هەوڵدان".

گواردیۆلا ئاشکرای کرد: "من نیگەران نیم لە دروستکردنی هەل، دڵنیام کە دەتوانین ئەوە بکەین، بەڵکو بابەتەکە پەیوەندی بەوەوە هەیە چۆن بەرگری دەکەین؛ ئەرکەکە زۆر گەورەیە و تۆمارکردنی سێ گۆڵ بەرانبەر مەدرید ئاسان نییە، ئەنجامی یاری چونیش دڵخۆشکەر نییە".

هەروەها وتی: "بەڵام لە هەمان کاتدا ئێمە لێرەین، لە یاریگای ئیتیحاد هەمیشە دەتوانین بە یارمەتی هاندەرانمان جۆش و خرۆش دروست بکەین و یارییەکی باش پێشکەش بکەین، ئەمەش بەهۆی ئەو یاریزانە بەهرەمەندانەی هەمانە. دەبێت بە باشی بەرگری بکەین و یاریزانەکان لە شوێنی گونجاوی خۆیاندا بن".

ئاماژەی بەوەش کرد کە تیپەکە هەوڵ دەدات بگاتە گۆڵ و بەرگری لە بۆشاییەکان بە باشترین شێوە بکات، جەختیشی لەوە کردەوە کە پێویستیان بە یارییەکی بێ کەموکوڕی هەیە لە زۆر لایەنەوە بۆ ماوەی 90 خولەک و وتی: "بێگومان دەتوانین هەل دروست بکەین، ئەگەر لەبەردەم گۆڵدا یەکلاکەرەوە بین و بەتایبەت ئەگەر بە باشی بەرگری بکەین، ئەوا چانسمان دەبێت".

ڕاهێنەرەکە هەندێک لە "گەڕانەوە" (ریمۆنتادا) بەناوبانگەکانی مان سیتی لە یاریگای ئیتیحاد وەک سەرچاوەی ئیلهام بۆ تیپەکەی بەبیرهێناوەوە و وتی: "یارییەکەی ئەستۆن ڤێلا لە کۆتا یاری خولی ئینگلیزی ساڵی 2022 گەڕانەوەی دڵخوازی منە، کاتێک تاوەكو خولەکی 74 بە دو گۆڵ دواکەوتبوین و لە ماوەی 12 خولەکدا سێ گۆڵمان کرد. گەڕانەوەی سەرسوڕهێنەری تریشمان هەبووە لەم پاڵەوانێتییەدا، بەڵام بەهۆی وردەکاری بچوکەوە چوینەتە دەرەوە، بۆیە دەبێت یارییەکە لە زۆر لایەنەوە بێ کەموکوڕی بێت".

لە کۆتاییدا وتی کە هاندەران و بڕیارەکانی ناوبژیوان و زۆر شتی تر دەبێت لە بەرژەوەندی ئەوان بن، وتیشی: "ئەمە وەک یاری کۆتایی وایە و هەست دەکەم بە هەموو توانایەکمانەوە هەوڵ دەدەین، بەڵام ئایا سەرکەوتو دەبین یان نا، ئەوە نازانم